上星期日同閨蜜濕平完後, 由於都到中午午飯時間, 本想去掃街慳番少少,
但朋友話雙腳實在行到無力, 咁啱又途經女人街
所以就又拉左朋友去"街坊"度開飯~
街坊之前食過幾次, 覺得價位唔錯, 地方好坐又闊, 再加上冷氣長開, 餐廳又長播MV同埋播歌,
係度食個唔太貴既LUNCH 都好OK架~
而且呢度仲有雞疍仔碗仔翅, 咁就唔洗同閨蜜企係街度食了~可以好好坐低食番餐~
我點左法式鵝肝雞肉意大利飯
而朋友點左蕃茄肉丸意大利粉
二款都有碗仔翅/雜菌忌廉湯揀
另外仲包飲品, 以幾十元來講都算好抵食~
好口渴先來杯涷O茶~ 涷O茶又幾好飲喎, 唔會太甜, 而且餐廳唔孤寒, 有3片完整既檸檬係入面, 茶味幾濃又有陣陣檸檬味~
鵝肝雞肉意大利飯 - 雖然賣相與想像有點出入, 本以為是深色那種, 但口感完全唔輸蝕, 每粒飯都夠濕潤又又唔會太漏, 夠入味之餘又唔會太咸, 飯入面仲有雞肉和雜菇, 雞肉都幾滑溜, 唔錯!
而雞肝都幾大塊, 入口豐潤, 不過就有少少筋, 稍稍美中不足~
蕃茄肉丸意大利粉 - 酸甜有度, 唔會酸到那埋塊面XD
肉丸幾大粒幾有咬口, 意粉夠彈牙, 炒得都幾入味, 每條意粉都有濃濃既蕃茄味道~
再加埋杯熱檸茶, 爽!
不過我覺得最好味都係碗仔翅!!! 原來做街坊野先至最耍家! 碗仔翅係色, 香, 味方面都冇得輸, 最中意佢入面疍絲同埋木耳絲,食落去層次好豐富! 再加上翅既湯底做得好好, 唔會太咸太嗆喉, 係入味得來又唔會食到好重味精, 食完都冇好口喝感覺, 好好味!
埋單計都係HKD 164, 為起人頭計都係八十幾蚊, 係旺角來講都幾抵食呀!
沒有留言:
張貼留言