<美味>~ * 高質鰻魚飯@moshi moshi~*

尋日下午有少少事情要係尖沙咀辦, 所以諗住一個人係附近揾間靜少少既餐廳坐一陣,

食個Lunch避下雨先再出發~

係美麗華附近行左一陣, 見到有間叫Moshi Moshi 地方唔錯, 而且雨天客人唔算好多,

而且又剛剛過左廿點半, 坐得應該好舒服, 所以就入內尋食~

因為一個人既闗係, 我點左荔枝紅茶、汁燒鰻魚飯(跟味憎湯)~

好快地, 我既荔枝紅茶送上了,單看賣相已經拿滿分!!

味道方面, 佢有好香既荔枝味道, 茶味香濃, 甜甜地好好飲!

而且除左顏色好靚之外,紅茶面仲有一顆又大又甜既荔枝用日本牙簽插住, 令到口感更加甜!充滿荔枝香味~

汁燒鰻魚飯(跟味憎湯)~ 

用上咖喱汁伴住. 底部係疍包飯, 上面則放左一件好大塊既鰻魚!

 

日式咖喱口感唔會辣, 反而有陣陣甜味, 而且非常惹味, 單用來伴飯都好好吃~

另外疍包都好好食!! 疍整得好嫩滑幼細, 口感就似炒到好滑既滑疍一樣, 用匙羮細細力就穿破, 

入口充滿濃郁既疍香味, yum!

主角鰻魚都冇叫我失望, 用燒汁整條烤到好脆口, 魚肉一點腥味都冇, 口感結實唔散, 

亦非常有彈性, 整條搽上均勻既燒汁, 配合滑疍+咖喱實在好好食! 

味憎湯同樣高質, 與坊間的高下立見, 味道唔會死咸,而且有點點鮮魚味, 大家有機會不妨試試~

moshi moshi

尖沙咀金巴利道35號金巴利中心地下B舖