<美味>~抵食又好食既餃子店@ 龍鳳祥餃子館~*

都幾喜歡去龍鳳祥餃子館食餃子, 除左餃子真材實料好好食之外

價位又唔高, 再加上選擇都幾多, 所以間唔中諗唔到食乜好時,

都好中意去呢間食餃子架~

龍鳳祥餃子館共有二間分店, 西九龍中心同佐敦店, 以環境來講, 我覺得西九龍中心果間坐得舒服啲, 可能店子比較大既闗係, 坐得唔洗咁迫, 而佐敦店就迫左少少~

今次咁啱要出尖咀買小小野, 所以就同左媽咪過來食了~

坐好後, 落左單冇咩做就睇吓姐姐包餃子~ 姐姐真係好熟手, 唔洗一陣就包到隻隻又圓又大隻既餃子了!

飲杯豆漿先~豆漿抵飲, 只係hkd 6/杯咋!! 而且味道唔錯, 唔太甜又有豆味, 好好飲!

媽咪既韮菜豬肉餃 - 由於佢唔叫面既闗係, 一碗有10粒!! 

另外佢加左hkd 5 要左個秘製牛湯, 加錢既湯真係特別好味,  

又濃又有大大陣牛既香味!

韮菜豬肉餃貨真價實, 皮夠薄之餘, 每隻餃都釀滿香噴噴既韮菜豬肉, 韮菜既香味再配合豬肉既鮮嫩多汁,好味好味!

肉三鮮係我既all time favourite! 三鮮包括韮菜, 豬肉, 蝦仁, 除左剛才提過韮菜豬肉既鮮香嫩滑外,佢會再加入大大隻又爽又彈牙既大蝦, 令到成隻餃子多左一個爽脆既口感, 真係好好味架~

不過呢款我就冇加錢換湯, 所以呢款湯略略平凡左少少, 淡味左少少, 下次加錢試番牛湯先~

 

最後點多個麻辣豬耳先~ 辣度適中, 應該大部份朋友都食到~佢會有少少麻味, 令到辣既層次更加突出, ~ 豬耳切到細細片, 入口就更加脆了, 再夾埋青瓜絲甘荀絲來食, 口感就更加好了!

龍鳳祥餃子館

佐敦白加士街53號地下  

28988758